Пресвятая Богородице, спаси нас.

Великий преднаписа во пророцех Моисей Тя, ковчег, и трапезу, и свещник, и ручку, образно назнаменуя воплощение, еже из Тебе Вышняго, Мати Дево. (Дважды.)

Слава: Умерщвляется смерть, и тление упражняется Адамова осуждения, о Владычице! Плоду Твоему приразившееся: жизнь бо родила еси, от истления избавляющую поющих Тя.

И ныне: Закон изнеможе, и сень мимо иде, паче ума и смысла явльшейся ми благодати, еже от Тебе, Дево, Рождества, Бога и Спаса, Многопетая.

Катавасия: Божественное сие и всечестное совершающе празднество, богомудрии, Богоматере, приидите руками восплещим, от Нея рождшагося Бога славим.

Господи, помилуй. (Трижды.)

Слава, и ныне:

Кондак.Глас 6

Живоначальною дланию, умершия от мрачных удолий, Жизнодавец, воскресив всех Христос Бог, воскресение подаде человеческому роду: есть бо всех Спаситель, Воскресение и Живот, и Бог всех.

Икос: Крест и погребение Твое, Жизнодавче, воспеваем вернии, и покланяемся, яко ад связал еси, Безсмертне, яко Бог Всесильный, и мертвыя совоскресил еси, и врата смертная сокрушил еси, и державу адову низложил еси, яко Бог. Темже земнороднии славословим Тя любовию, Воскресшаго, и низложившаго вражию державу всепагубную, и всех воскресившаго в Тя веровавших, и мир избавльшаго от стрел змииных, и от прелести вражия, яко Бог всех.

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.

Слава, Господи, Святому Воскресению Твоему.

Рыдающее во страсти Твоей Солнце, во мрак облечеся, и во дни по всей, Владыко, земли свет померче, вопия: благословен еси, Боже отец наших.

Слава, Господи, Святому Воскресению Твоему.

Облекошася, Христе, схождением Твоим во свет преисподняя, праотец же веселия исполнь явися ликовствуя, взыграся вопия: благословен еси, Боже отец наших.

Пресвятая Богородице, спаси нас.

Тобою, Мати Дево, свет возсия всей вселенней светлый: Зиждителя бо Ты всех родила еси Бога. Егоже проси, Всечистая, нам низпослати верным велию милость.

Ин канон

Слава, Господи, Кресту Твоему Честному и Воскресению.

О страннаго образа! Израиля избавлей от работы фараонския, распинается волею от него, и разрешает вериги согрешений. Емуже верою поем: Избавителю Боже, благословен еси.

Слава, Господи, Кресту Твоему Честному и Воскресению.

Тебе, Спаса, на лобнем распяша пребеззаконных отроцы нечестивии, врата медная и вереи сломившаго, во спасение нас поющих: Избавителю Боже, благословен еси.

Пресвятая Богородице, спаси нас.

Евы древния свобождение рождшая от клятвы, разрешаеши Адама, Дево Чистая. Темже со Ангелы Тя, с Сыном Твоим поем и вопием: Избавителю Боже, благословен еси.

Ин канон

Пресвятая Богородице, спаси нас.

Юнош триех пещь не опали, Рождество прообразующих Твое: Божественный бо огнь Тебе не опалив, вселися в Тя, и вся научи вопити: благословен еси, Боже отец наших.

Пресвятая Богородице, спаси нас.

Блажат концы Тя, Всечистая Мати, якоже прорекла еси, просвещаеми светолучными сияньми Твоими, и благодатию поюще, вопиют: благословен еси, Боже отец наших.

Слава: Пагубныя убо зубы в мя вонзе змий лукавнейший: но Сам Твой, Богомати, сокруши Сын, крепость же мне даде вопити: благословен еси, Боже отец наших.

И ныне: Очистилище естества Ты еси едина, Богоблаженная, на раму бо херувимску седящаго Бога во объятиих носящи вопиеши: благословен еси, Боже отец наших.

Катавасия: Не послужиша твари богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог, благословен еси.

Песнь 8

Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.

Слава, Господи, Святому. Воскресению Твоему.

Иудейския древле пророкоубийцы люди, Богоубийцы зависть ныне содела, Тебе на Крест вознесшия, Слове Божий, Егоже превозносим во вся веки.

Слава, Господи, Святому Воскресению Твоему.

Небеснаго круга не оставил еси, и во ад сошед, всего совоздвигл еси лежащаго во гноищи, Христе, человека, Тя превозносяща во вся веки.

Пресвятая Богородице, спаси нас.

От света Светодавца Слова зачала еси, и рождши неизреченно Сего, прославилася еси: Дух бо в Тя, Отроковице, Божий вселися. Темже Тя поем во вся веки.

Ин канон

Слава, Господи, Кресту Твоему Честному и Воскресению.

Ужасеся всяк слух, како Вышний волею прииде на землю, адову крепость разрушити Крестом и погребением, и вся воздвигнути звати: отроцы благословите, священницы воспойте, людие превозносите во вся веки.

Слава, Господи, Кресту Твоему Честному и Воскресению.

Преста адово мучительство, и царство уничижися прочее, на Кресте бо на земли водрузився, иже над всеми Бог, сего могутство низложи. Егоже отроцы благословите, священницы воспойте, людие превозносите во вся веки.

Пресвятая Богородице, спаси нас.

О неизреченнаго Твоего, Христе, человеколюбия, и неизглаголанных благ! Мене бо видя погибающа во адове темнице, страсти претерпевый избавил еси. Темже Тя благословим, всех Владыку, и превозносим во вся веки.

Ин канон

Пресвятая Богородице, спаси нас.

Позлащеною ризою якоже царицу Сын Твой просветив зарею Духа, Тебе одесную Себе постави, Пречистая, Егоже превозносим во вся веки.

Пресвятая Богородице, спаси нас.

Иже хотением единым мир водрузивый, от пречистыя Твоея утробы плоть вземлет, свыше сию наздати хотя, Егоже превозносим во вся веки.